RSS

Tag Archives: 爽報

李兆富:暴風和暴民

2012年7月26日 爽報

有個行將退休嘅政治演員,每逢港鐵(066)出事,就大肆鞭撻。鬧大機構有市場,唔鬧先至反常。原來十號風球之下,港鐵職員即時失去人權同尊嚴,明晒!

天災,冇人想。故事教訓我哋,明知打風,最好盡早返屋企。七月初,我人在花旗國。一場怪風,將中西部到東岸好多地方吹到停電,而且一停幾日。呢次大停電,廿幾年來從未試過,好多家庭都無法及時準備,就算想買後備柴油發電機都買唔到。剛好又熱浪來襲,好多長者同長期病患者,熱到叫救護車,亦有幾十人因此失救。

不過,我好少見到有美國政演借機抽水鬧政府或電力公司。修復電纜進度,大家明白,工程人員在熱浪下戶外工作,已好辛苦。傳媒評論,重點係叫大家記得飲水。鄰居之間,有人將雪櫃入面嘅食物煮晒,然後分畀大家,反正唔食,都會壞。又有人請大家去自己屋企個泳池解暑,亦有商場、酒店,歡迎大家去大堂免費凉冷氣。

剛剛過去的周末,又有奇遇。話說,我要返上海開會,飛機嚴重誤點。地勤早已被包圍。五小時之後,即半夜時份,先有得上機。上機我即刻沉睡。一個鐘後,飛機仲未起飛,原來有乘客拒絕上機。

當機長話唔等,要開機,佢哋又衝閘。點解香港文化越來越劣?你話呢?

廣告
 
發表留言

Posted by 於 2012/07/26 in 有關閒情

 

標籤: ,

利世民:點樣發達?

「點樣發達?」呢四個字,財經版讀者每日都會諗。「有錢咪發達囉!」好多憤世嫉俗嘅人咁講;我更肯定,抱有呢個想法嘅,好難發達。

「有錢都唔算發達?咁點先算發達?」真正嘅有錢人,絕對無一夜致富呢回事。「錯喇!睇吓搞Instagram班後生仔,一夜之間,畀facebook用十億收購,個個富過中六合彩!」

一夜之間?不如問吓自己,人地捱更抵夜做隻App嘅時候,你又做緊乜?成功之前,有好多汗水,但成功之後,都被人遺忘,膚淺嘅人,總以為成功係一夜之間嘅事。

Instagram由開始到被人買起,用咗一年半時間;一年半,話長唔長。今日見到十億呢個銀碼,自然覺得一年半係極速爆起。不過,假如無呢個結局,又會有幾多人關心呢間公司呢?

「手機最重要功能,除咗上網,就係影相,第三先至係講電話。成功將影相同上網分享搓埋一齊,抵佢發達啦!」事後孔明,永遠都係最易做。不過,一年半前隻好似Instagram嘅App,會有幾多人同你講:「乜facebook唔係有相簿功能咩?好多人都做咗影相App啦,你隻嘢有乜咁特別?」

當你同人講,成功,並唔一定要全球獨家,只要做得比人家好、更精細、更有信念,嗰班以為有錢就等於發達嘅人就話:「嘥氣啦!信念邊搵到錢㗎?實際啲好喎!」

實際啲?點解硬係有人會覺得,有信念就係等於唔實際呢?呢種態度,香港人特別嚴重。會唔會係大家從小都已被填鴨式教育洗腦,覺得乜嘢都有標準答案,人生目標,就係去估中個標準答案。獨立思考,反而會斷送前程?

返去最原本嘅問題:「點樣發達?」

可以做一件事,有人要,你自然會搵到條路,堅持落去,就有機會發達。係咪好簡單?。不過偏偏好多人,寧願信發達係一夜間嘅神話。對唔住,我忘記咗,機會永遠都只係留畀願意去爭取嘅人。

利世民 
專欄電郵:SharpHK.Simon@gmail.com 
Facebook專頁:www.facebook.com/AppleSimon

 
發表留言

Posted by 於 2012/04/12 in 有關商業

 

標籤: ,

利世民:窮小子長大後五個最傻氣嘅習慣

2012年2月13日 爽報

上星期,爽人物訪問九巴車長阿龍。呢位記者筆下嘅好爸爸,希望政府可以派錢,因為舊年佢一家四口收左筆錢之後:「即刻跑去買咗個新電視機……其餘嘅錢,用嚟辦年貨同交保險,好似出雙糧。」

改變窮嘅心境,不但止係脫貧嘅第一步,更加可以即刻提高生活質素。網上有一篇理財文章「窮小子長大後五個最傻氣嘅習慣」(The 5 Stupidest Habits You Develop Growing Up Poor),我覺得好值得香港人參考:

一,愛上垃圾食物。當一個人窮,買野嘅時候,都只係會睇價錢。世界上,有營養又好食嘅野,可以好平,不過,一定要花心機去搵去諗去整。當一個人對眼淨係睇到個價錢牌,要佢去搵去諗去整好食又有營養嘅食物,機會微乎其微。結果,對呢啲人來講,垃圾食物就成為佢地心目中最美味嘅食物。美國有美式垃圾食物,香港地一樣有港式垃圾食物。

二,一收到錢就即使晒。對好多銀行無結餘嘅人,一收到錢,第一件事,就係諗點樣用咗佢。我明白,佢地有好多野想要,就好似爽人物訪問個位九巴車長阿龍一樣。我亦聽過唔少故事,話啲中左六合彩嘅人,過左幾年就打回原形。其實道理好簡單:好多消費品,其實都係可有可無,好多人可以唔需要呢啲消費品,一直生活落去,但係手上一旦多咗筆錢,就心郁郁。學習有錢唔使,係理財嘅第一步。

三,將過節送禮睇得好大。延續上面一條,好多窮人,自細習慣每年只有過時過節先至可以盡情消費。呢個習慣,好多人大個咗之後,都唔會點變。

四,時時實銀行戶口。當個戶口得番$138.76,任何人都好自然會時不時都去睇下,究竟幾時會出糧,同埋諗下之後幾日每日可以使幾多錢。我都試過有咁嘅日子。尤其是有網上理財,我會得閒就登入,望下有幾多錢;呢個壞習慣,不但只令一個人持續地緊張,最大嘅問題係:一旦需要為未來承受些少財務風險,習慣睇住個銀行結餘做決定嘅人,會傾向唔博,好多時就因此失去機會。

五,錯過慳錢機會。餐搵餐食餐餐清嘅人,只會響最後一刻去做消費決定。如果今日洗衣粉大減價,但係屋企又未用晒,你會唔會賣定先?洗衣粉係小事。其他大銀碼消費品呢?爽人物九巴車長阿龍買個部電視嘅時候,唔知電器舖有無做減價呢?

專欄電郵:SharpHK.Simon@gmail.com 
Facebook專頁:www.facebook.com/AppleSimon 

 
發表留言

Posted by 於 2012/02/13 in 有關商業, 有關情理

 

標籤: ,

利世民:價格分歧和劏客

2012年1月26日 爽報

農曆新年假期睇新聞,來來去去仍然係中港矛盾。孔慶東詆毀香港人係狗,之後又反口,死都唔認。唔通佢當香港人係白痴?另一邊廂,有大陸網民發起,年初五集體去地鐵食嘢。不過,有理由相信,中國人向來難以團結,呢個創舉,恐怕都係講就天下無敵。

早兩日《蘋果日報》有一單新聞都幾耐人尋味。話說一間名為廣東燒味嘅茶仔,餐牌實行一國兩制:「遊客價貴五成到一倍,本地人就收正價。」嘿!如果廣東燒味個老闆話撐香港人抗通脹: 「自由行遊客正價收費,本地人特惠半價。」唔知會唔會有人封佢做香港良心呢?

同朋友P講傾開劏自由行客。佢話去開上環一間涼茶舖食龜苓膏,舖外大大隻字寫「特級龜苓膏$300」。入到去,只要用純正港式粵語問:「有冇唔係嘅特級龜苓膏?」阿姐自然會好醒目咁話:「你咁靚仔,食平時個隻50蚊就OK啦!」

記得大教授張五常名作《賣桔者言》講過:「同樣的貨品,同樣的成本,以不同價格出售,叫作價格分歧(Price Discrimination )。」

通脹令價格嚴重扭曲

張大教授通過實踐得出結論:只要訊息成本夠高,就可以實行價格分歧。遊客人生路不熟,訊息成本一定高。不過,最令我覺得有趣嘅係,涼茶舖竟然將個價錢貼出來,都可以玩價格分歧,道理又點講呢?

其實,聽到朋友P講呢間涼茶舖,我第一個問題係:「呢間舖嘅老闆唔怕趕客咩?」

朋友A插嘴話:「300蚊龜苓膏,賺死人咩。趕走晒啲本地客都唔驚啦!」不過,做食肆完全無本地客幫趁,一睇就知到係劏客啦。

我另一個問題係:「$300龜苓膏個牌,係唔係殘體字?」

朋友P:「好似唔係喎!成間涼茶舖都係正體字,忽然有個牌寫殘體字,你真係當自由行係白痴咩?」

言語不通,絕對係遊客嘅訊息成本。更重要嘅係,過去幾年,通脹令到價格嚴重扭曲;乜嘢算抵,乜嘢叫貴,越來越難單憑直覺去判斷。尤其是今日大陸嘅物價更加係完全無譜。

喺呢種物價亂晒籠嘅世界下,自然會孕育出靠價格訊息成本生存嘅人。所以,我幾時都話,通脹唔只經濟學咁簡單,更加係社會現象。

利世民
專欄電郵:SharpHK.Simon@gmail.com

 
發表留言

Posted by 於 2012/01/26 in 有關商業

 

標籤: ,

利世民:與民為敵 泛民輸得有道理

2011年11月8日 爽報

泛民和泛民的死硬派支持者,輸了今次區議會選舉,你們一定心有不甘。從政以來都在打順景波的公民黨黨魁梁家傑說:「不希望香港區議會只是蛇齋餅粽,只是派福利派實利的代理人。」

睇怕你們仍然未知輸字點寫,以下十二點,希望可以點醒你們:

一,民主的意義,就是參選的人有機會輸。如果在你們心目中,民主等於「自稱民主派的人便長玩長有」。對不起,你們搞錯了。

二,從政、做生意和談情說愛都一樣,要是被人離棄,請不要怪別人不懂欣賞你的好處。請你問問自己,那裡做得不夠。

三,輸不起,便不要從政,不要做生意,也不要談情說愛。

四,每次你將輸贏的責任推卸到別人身上,你也白白放棄進步的機會。

五,選舉的確是講動員,也講資源。不過,如果說你們將輸贏全部看成動員和資源,那實在是太過低估了選民的智慧。

六,說人家獻世派有「蛇齋餅粽」。嘿!泛民何嘗不是天天在慷他人之慨,企圖打劫少數的納稅人,討好他們心目中的大多數「基層」?

七,基層?泛民啊,泛民,你們當中沒有幾個研究功夫底子札實一點的社會學者朋友嗎?他們沒有告訴你們,其實香港人的主流意識傾向保守?

八,一直以來,保守的香港人,默默投票給你們,就是希望香港可以至少50年不變。可是,過去幾年,究竟是誰在將香港翻天覆地?

九,許多中產納稅人、家長和業主,其實有滿肚子的怨氣,不過我們卻想不到一個理由去投票給你們。我們當中甚至有不少曾是泛民的長期支持者,也對你們感到厭惡。

十,說到底,如果你們到這一刻仍然認為,你們輸是因為選民沒有眼光,因為蛇齋餅粽。對不起,我覺得這是你們應得的教訓。

十一,重申一次,只有最蠢的政客才會將選民放在自己的對立面。你們可能慣了做高高在上的尊貴議員,不過請記緊,面是人家畀,架永遠是你們自己丟!

十二,請你們記住自己經常掛在口邊罵政府官員的一句:不要與民為敵。

 
發表留言

Posted by 於 2011/11/08 in 有關時事

 

標籤: , ,

利世民:廢青的三大特點

2011年11月7日 爽報

廢青不廢青,跟年齡沒有關係,重點在於心態。八零後,當然有廢青,但也有大好青年。當然,最悲情的,是那些幾十歲人,仍然天天自怨自艾的超齡廢青。這個沒有年齡歧視的廢青定義,相信連平機會是應該會歡迎接受的。

不過,既然有讀者提出要求,今日我就再接再厲,點出廢青三大特點,讓大家可以一眼睇穿,廢青是甚麼一回事。

廢青的第一大特點:「唔長進」。 對廢青來講,他們人生最大的挑戰,是中學會考和大學O-Camp,過了這些事,他們的人生只剩下茫然的一片空白。不過,作為一個成年人,我們要能夠面不紅,氣不喘,講出在過去一年,一月,甚至一日,究竟自己有過甚麼新進境。

廢青的第二大特點:「賴得就賴」。找不到工作,是顧主沒有眼光。工作不如意,是上司有問題。沒有女朋友,是港女有公主病。沒有男朋友,因為靚仔和有錢仔都是基佬。賺不到錢,是資本主義的錯。買不到樓,是地產霸權的罪。不過,作為一個成年人,我們會問:「別人能夠做得到的,自己做得到嗎?」當然,我不會像唐英年般白痴,問自己為甚麼不是李嘉誠;因為唐英年就算有如此父蔭,也做不到李嘉誠。不過,搵工、打工、結婚、生仔和做生意,大把人都做得到,只有廢青才覺得自己永遠都做不到這些事。

廢青的第三大特點:「老奉」。社會除了奉旨要對他們供書教學,另外要再加公屋一間、鐵飯碗一個,以及想點就想的自由。廢青只知道攤大手板,但從來都沒有想過,各種福利的背後,是許多人每日辛勞的結果。沒有我們買樓交稅,庫房的錢難到從天而降?廢青想解放香港?心領了。不如你們先用自己的能力,還清那筆大學貸款,也不要跟公公婆婆爭單人公屋,好嗎?不過,作為一個成年人,我們知道,這個世界沒有無原無故的著數,但有厚顏無恥的寄生蟲,偷偷地將福利變成權利。

如果你看完這一篇,覺得精神爽利,肯定你不是廢青,也請你將這份感覺跟朋友和家人分享,功德無量。

 
發表留言

Posted by 於 2011/11/07 in 有關閒情

 

標籤: , ,