RSS

Tag Archives: 左丁山

左丁山:隔籬飯唔香

2013年8月27日 蘋果日報

星加坡總理李顯龍宣佈未來建屋大計,不少香港人盲從附和,大聲叫好,大嗌隔籬飯香,有年輕朋友問左丁山點睇,左丁山話:「你咪移民去星加坡囉,睇吓買唔買到樓!李顯龍叫年青人Get married. Get a flat,好啱你聽吖。」但年青人話:「我在澳洲讀書時,有不少星馬兩地華人同學,佢地個個都想留在澳洲搵工,唔係幾願意返星加坡、吉隆坡噃,點解我要去星加坡?」

呢啲理由,講出嚟就一疋布咁長,不談也罷,但見到香港有咁多個評論員、專欄稱讚李顯龍,幾乎一面倒,實在奇怪,難怪有心水清人士話「李顯龍在港受歡迎過星洲」。呢班有知識嘅份子成日批評香港特區政府,當然有言論自由,講乜都得,亦都因為香港人慣咗有言論自由,政府收地呀,起第三條機場跑道呀,填海呀,建設西九龍文化區呀,市區重建呀等等,有邊一次冇環保團體、居民團體、利益團體齊聲反對?有邊一次順利過?有邊一次唔係諮詢諮詢又諮詢,司法覆核、上訴又上訴,搞到冇番十年八年,休想有一項大型工程可以上馬。就在那十年八年,星加坡已經填海闢地以平方公里計,不是以公頃計,難道星加坡真係咁好彩,填親海都冇一條魚受到影響?佢地大肆擴建樟宜機場又唔會帶來噪音?星加坡有冇綠色和平活動呀?

星加坡電視電台報章全由政府控制,邊一位政務官出任電台(或廣播署)阿頭,一定冇工會人士膽敢以黑地氈招呼,一定冇人敢喊一句編輯自主,一定冇烽煙節目日日大駡政府。講完了,星港情況好不一樣,完全不可比較,一啲評論員在電視上講香港不要迷信經濟放任自由,政府要適當干預,星加坡係好例子云云,根本係牛頭唔搭馬嘴。李顯龍話收入六千港元之星加坡人一定可以買得起樓,即使唔計地價,星加坡嘅樓面建築費都便宜得驚人,令人懷疑如何計數。在香港單係建築費也要3000至4000元一呎,六百平方呎單位嘅建築成本高達200萬元以上,6000元月薪,點供樓?建築邦話俾左丁山聽建築材料價格係世界性,星加坡不會佔到便宜,但佢地可以大量輸入馬來/印尼廉價勞工,曾淵滄(星加坡國民)仲提供數字,星加坡有二百萬名外勞!或者因此可以降低成本。剩係呢樣,香港人如果反對外勞,就唔好稱讚星加坡房屋政策啦,好心!

廣告
 
發表留言

Posted by 於 2013/08/27 in 有關時事

 

標籤: , ,

左丁山:罵強積金

2012年11月4日 蘋果日報

好多人鬧強積金,一鬧收費高,二鬧回報率劣,三鬧冇自由度,要等到65歲先至可以取回,唔可以預支嚟買樓、醫急病。三罵之中,只有收費高呢樣,罵得較有理由,范鴻齡做強積金局主席之時,已睇到呢一點,提出強積金半自由行,等打工仔可以自由選擇自己供款嘅基金,藉此逼基金因競爭而削減管理費,呢樣嘢現在實行啦,但叫打工仔如洗碗阿嬸或地盤工人去自由選擇基金,因限於投資知識,實在係幾困難,以後企業嘅人力資源部相信會遇上不少特殊問題。

第二罵未必有理由,睇消委會之強積金研究報告,以十年為期,每年平均回報甚為不俗,一啲人話自己每個月定期投資一千元(以二萬元月薪供5%計),慳番管理費,買晒領匯,唔知幾爽。呢樣係知易行難,第一要考個人之規律;第二,每月買領匯亦有費用,買入碎股(因一千元未必夠買一手)嘅價錢唔同;第三,個人有無耐性買足三十年領匯基金呢?有位年輕朋友每個月定期(月供股票)買入滙豐碎股(因一手要兩萬至三萬銀,冇咁多錢買),買咗五年,蝕得好傷心,但在每股125元時已經買入,唔通家唔繼續月供咩。幾年來,佢睇住滙豐股價,心情起伏並不好受,成日唔忿氣點解當日唔買領匯,正一係有早知,冇乞兒啦。

第三罵並無理由,強積金係專款專用,作退休保障金之一種,並非全部,每月供一千(僱主供另外一千元),有排都供唔到夠錢做買樓首期啦,醫病呢樣事,要靠平時買醫療保險,唔好向強積金打主意。

有教授大罵強積金,罵得非常肉緊,都不知為乜咁勞氣,強積金每個月頂晒龍供二千多元,打工仔嗰份佔一千多元,有甚麼大不了?如果你有教授月薪,約十萬元,還有不少餘錢俾自己自由投資,嗰一千多蚊咪當作好似細佬哥時擺錢入錢罌囉,到六十五歲時攞番,有何不妥?罵強積金當然可以,但不用破口大罵,視之為洪水猛獸,好似搶晒你啲血汗錢咁緊要。現時有泛工黨議員倡議設立全民退休保障,內容不詳,如全民退保要持續嘅話,市民必須每月供款(如美國社會保障),供到六十歲,究竟供款應該幾多,有排爭拗,但不能不供,否則以香港人口老化速度之快,今日之80後、90後會斷擔挑。

 
發表留言

Posted by 於 2012/11/04 in 有關經濟

 

標籤: , ,

左丁山:懷舊

2012年4月28日 蘋果日報

幾日前睇到一篇專欄,寫得好有趣,大意係講今天的中坑懷舊早餐,係買一份報紙,到老式茶樓(市面上已經好少有)飲茶,一盅兩件,或者到大牌檔(又係好少有)叫杯奶茶食多士;至於老坑懷舊,就係捧一籠雀到茶居,食番個叉燒包。

似乎有幾多人鍾意懷舊,大概香港人已經老化,四十五至五十五歲人口佔七百零七萬人口嘅最大比例,人到中年,加上荷包有錢之後,就懷念小時候跟爸爸到茶樓嘅時光,其實自己當年好唔情願,話老頭子老套,唔去幫襯KFC或麥當勞(此兩快餐店在七十年代末及八十年代初在港開業,今天五十歲人士,嗰陣未到二十歲)。

懷舊呢味嘢,左丁山唔會認同。舊事物,除咗舊文章、舊著作(如錢唐牟三位大師在港出版之著作)或者高伯雨之「聽雨樓隨筆」等等外,有乜好懷念?左丁山絕對唔懷念睡在冷巷碌架床上格,與「同屋住」爭廁所,被逼要晨早跑落麥花臣球場臭味攻鼻嘅公廁嘅舊日子,或者在醉瓊樓食學生飯(豆腐斑腩飯)嘅時光,啲飯好難食啫,故此大學畢業搵到第一份工之後,至今未再去過醉瓊樓。好多今天之所謂老字號,當年不值一哂,如果今天仍是沒有進步的話,執咗好過啦。有一間不懷念過去,大力改進,追上二十一世紀經營手法嘅,就係六十年代上海街一間老套嫁女餅餅家,啲餅好難食,見到就怕。點知後人真係幾叻,搵到靳隸強設計新形象品牌包裝,造餅技術大革新,今天老而彌堅屹立不倒,成為香港名牌,啲芝麻餅、光酥餅都唔知幾好味,呢間就係「奇華餅家」,能與時俱進,好值得讚。比較之下,嗰啲死攬住過去,不知進步只懂埋怨租貴、人工貴、生意難做之所謂老店,奇華高出幾皮。

懷舊要適可而止,唔係舊店舊事就是好,過份懷舊根本不知進步為何物,給人家拋在後頭,唔好怨天怨地呀。今日年青人早上吃早餐就係到大家樂、大快活排隊,左丁山梗係唔制,但下一代行為如此,怎可以阻止?茶居愈嚟愈少,快餐店愈來愈多,乃大勢所趨,懷乜鬼舊吖。

 
發表留言

Posted by 於 2012/04/28 in 有關閒情

 

標籤: ,

左丁山:要古蹟唔講錢

2012年1月17日 蘋果日報

NOW電視訪問發展局局長林鄭月娥,有談及古蹟文物保護。香港今天有甚麼古蹟文物的話,多屬私人擁有,例如有所謂一級歷史古蹟建築,多數係世家後人嘅,最近嘅例子就係山頂道何東花園。

姑勿論古物諮詢委員會用甚麼理由將何東花園列為一級古蹟,林鄭局長對記者盡量不提嘅一件事就係呢類「古蹟」究竟對政府(即納稅人公帑)會產生甚麼代價。經濟學有所謂effective demand(有效需求)概念,任何需求一旦加上一個價錢牌,需求會立即下降。舉一個簡單例子,試吓問一位小六學生:「馳名雞尾包你要食幾多個?」小學生可能會答:「三至四個得唔得呀!」再問:「唔係免費嘅噃,一個雞尾包要賣四蚊!」小六學生可能答:「一個算嘞。」如果去到十蚊一個,小學生食唔起,寧願改吃其他。通常一個人荷包裏有錢,需求就會大一啲。置地廣場一間名店有靚手袋陳列,投資銀行女強人一睇就鍾意,想話買番一個,行入去一問,每個要十九萬元,女強人立即走番出嚟,佢嘅年薪大約係六百萬元(未計年尾花紅),要買都買得起嘅,但用咗近四成月薪去買一個手袋?女強人對左丁山講:「我仲未神經失常。」對佢嚟講,佢有強烈名牌靚手袋需求,但知道價錢之後,已失去「有效需求」。(後記:女強人有啲不忿,一個星期後再去名店望一望,手袋已經唔見咗,走入名店詐帝問女店員要買一個,女店員話:三件現貨已被內地女士買走晒!)

講番保育古蹟,林鄭局長講社會上未有一致意見要使用公帑從業主手上買入私家大屋當古蹟咁保育。咁咪係囉,政府都唔願意出錢,叫私人業主自動放棄發展重建所謂古蹟嘅權利呀?咪開玩笑。一位測量界人士對左丁山講過,山頂何東花園因位置優越,地皮面積大,後有密林山坡,前望香港仔,座北向南,在山頂區絕無僅有,要估值相當困難,以重建價值計,起碼值六七十億元,特區政府根本難以用納稅人嘅錢買入嚟做保護古蹟,如有幾十億元可以亂咁使,用嚟重建廣華醫院,對市民更有大貢獻啦!哦,唔畀錢而叫人地自動犧牲呢,與強搶民產有何分別?林鄭局長講嘅,只係古蹟需求,完全唔提對古蹟嘅有效需求,醒目到震。

 
發表留言

Posted by 於 2012/01/17 in 有關經濟, 有關時事

 

標籤: , ,

左丁山:香港會飛

2011年12月24日 蘋果日報

新加坡地鐵在十二月十五日星期四晚上七時發生系統性故障,烏節路至金融中心嘅地鐵交通癱瘓五小時,下班人士怨聲載道,呢類事情如果在香港發生,地鐵總裁與主席一定被召到立法會,俾議員鬧到跪低。

新加坡與香港有全方位競爭,樣樣爭排名,國際商會在日內瓦發表之「世界最開放市場」排名,香港有5.4分,排第一,新加坡有5.3分,排第二,中國內地得2.8分,排名五十七。另外在金融競爭力方面,香港超越紐約、倫敦,排第一名,新加坡排第四。

有人引用電視劇「天與地」(收視率二十三點,在TVB係幾低嘅收視)內一句說話:「This city is dying!」唱衰香港,令人諗起九七年回歸前美國《財富》雜誌嘅封面故事The Death of Hong Kong,呢個故事當然錯到離晒譜。根據林奮強「黃金五十」嘅最新研究報告(網址www.hkgolden50.org),香港有幾多指標係超越紐約、倫敦、新加坡嘅,譬如在「地鐵延誤機會率」方面,香港地鐵列車脫班率係0.3%,低新加坡五倍,低於紐約四十九倍,低過倫敦十一倍。人均罪案數字方面,倫敦搶劫案高香港48倍,強姦多香港30倍,暴力罪案多香港15倍,可見香港人出夜街比在倫敦安全得太多。享受美食方面,米芝蓮之全球唯一位於意大利境外嘅五星意大利餐廳就位於中環歷山大廈,香港有三星餐廳四間,二星十間,一星四十八間,比較之下,紐約有一星七家,二星九家,三星四十六家;倫敦一星二家,二星七家,三星四十六家,香港稱為美食之都,不算過份。

諗唔到嘅,香港嘅藝術活動極受歡迎,2011年之香港國際藝術展吸引入場人次63000,參展畫廊260,參展國家38,與世界著名嘅巴塞爾藝術節2011,倫敦藝術博覽會2011相比,有過之而無不及。香港有乜嘢毫無競爭力呀,最差就係空氣質素,比新加坡差五成,香港未來新特首必須正視!林奮強嘅報告好長,有145頁,睇完你會知道香港生機蓬勃與紐約、倫敦、新加坡相比,香港絕不輸蝕,係中國境內唯一有資格成為世界城市嘅大都會,點會dying呀,直情會飛,flying呀!

 
發表留言

Posted by 於 2011/12/24 in 有關情理

 

標籤: ,

左丁山:吃魚翅有罪?

2011年12月12日 蘋果日報

講食肆「有星無星」,一位讀者來電郵指左丁山經常話到鏞記四樓,唔去地下,言下之意,就係左丁山不識平民化。鏞記地下在午餐時份,人流之多,與翠華茶餐廳相若,不設預訂,難以搵位,左丁山故此唔去,並非不夠平民化,自己食早餐都只係買個雞尾包或菠蘿包啫,未試過去文華酒店食早餐或好似特首候選人搭地鐵時對記者講:自己會搭地鐵,去半島酒店食早餐!幾位朋友在十二月四日中午十二時左右睇有線電視直播,聽到呢句說話,不禁讚嘆候選人有品味,去半島食早餐噃,亦夠聰明,朝早從山頂去半島,塞車會塞到過晒鐘,搭地鐵就真係醒!好多年前左丁山在尖沙嘴地鐵站等車,碰到信和大股東黃志祥,又碰過一位特首候選人嘅爸爸唐老先生,佢地兩位點解唔坐私家車去中環?兩位都話:費事塞車啦。

黃昏繁忙時間搭地鐵去半島食自助餐最方便,西式與日式皆宜,星期五晚上慢慢嘆無以尚之。半島魚翅反為冇咁出名,專登要食魚翅之食客,大概唔會去半島,故此半島宣佈以後不售魚翅,只係為咗宣傳,並無甚麼營業損失。禁售魚翅一事,鬧到全世界華人好似係罪犯咁樣,多倫多有激進動物權益保護團體宣稱要向華人食肆報復(因華人反對禁食、禁售魚翅),不排除有種族仇視成份,佢地咁保護動物,又唔見佢地去反對加拿大人捕殺海豹、食海豹肝,法國人食鵝肝,俄羅斯人好魚子醬,又唔見禁售、禁食鵝肝、魚子醬?

一位出席國際海產會議多年嘅海產L對左丁山講,聯合國批准可捕吃之鯊魚有四百四十餘種,又明令規定不准捕殺鯨鯊與姥鯊(天九翅),歐洲人每年耗用鯊魚肉達十幾萬噸,製作魚肝油、魚油、鯊魚骨等等,漁人將鯊魚翅出售到亞洲,只係當作副產品,不浪費而已,有何殘忍可言?唔通要漁民殺死鯊魚後,批掉魚翅掉落海洋乎?海產L指環保團體不求甚解,胡亂指責華人食翅不文明,有隨着西方笛子起舞之嫌!那麼為何有紀錄片顯示漁人對鯊魚剝翅之後拋鯊魚落海?海產L話紀錄片來源不明,此乃非法行為,正當漁民唔會做,亦冇咁笨,環保團體不應以偏概全!

 
發表留言

Posted by 於 2011/12/12 in 有關情理

 

標籤: ,

左丁山:兩大奇才

2011年10月11日 蘋果日報

喬布斯(Steve Jobs)在十月五日(美國西岸時間)逝世,香港於十月六日早上七時許睇到通訊社發出簡單幾句嘅新聞,呢位科技/電腦界一代奇才患上胰臟癌已有七年,能夠生存咁耐,已是奇跡,亦多得美國醫學技術昌明。二十一年前一位銀行朋友剛離開銀行,自行創業,點知公司未開,已發現染上胰臟癌,三個月之內就離開呢個世界,令我地非常傷感。喬布斯好彩,全世界消費者亦好彩,喬布斯在○四年逃過大難,自知每天都可能面對死亡,從容面對之餘,努力工作,推出iPhone、iPad,將全世界人士嘅每天生活型態改變晒,令電腦界與電話界嘅工業生態,從此不一樣。

二十世紀五十年代有兩位改變全球經濟運作模式與生活態度嘅偉大天才出生,一位係喬布斯(1955年2月24日),另一位係蓋茨(1955年10月28日),兩位都係入大學一陣子就覺得讀大學無用,退學創業。喬布斯在一九七六年與友人創立蘋果,蓋茨在一九七六年與Paul Allen成立微軟,兩人、兩家公司互相產生激烈競爭,各自揚名世界,以後三十五年將全世界之電腦業、資訊科技業搞到天翻地覆,與一九七六年之前有雲泥之別。

蓋茨係西雅圖有錢仔出身,父親係著名律師,高中高材生,未入哈佛大學已是電腦專家(見Malcolm Gladwell之暢銷書Outliers: The Story of Success)。喬布斯係基層工人家庭之收養子,終生未與生父見面(雖然生父好想與佢飲杯咖啡),因覺得用養父一生積蓄嚟讀大學,並不划算,故此未夠一年就退學,生活艱苦,吃過不少苦頭,執可口可樂罐搵錢買麪包,故此佢創業成功比蓋茨更艱苦,更神奇。近日美國有佔領華爾街行動,一位示威青年與保安員發生衝突,鏡頭前互駡,青年人駡保安員:「你為咗份工嚟趕我地!」保安員答:「我做呢份工幾十年,點解你唔去搵份工?」青年怒答:「我才不肯做一份每個小時只得七蚊嘅工!」呢位示威青年不肯以最低工資打份工,當然係想一開始就有份好工,喬布斯如果睇到,可能會唔同意,因為佢回收可樂罐時,每個罐只可換到五分錢,香港青年如以喬布斯為偶像,更加合適!

 
發表留言

Posted by 於 2011/10/11 in 有關閒情

 

標籤: , , ,