RSS

Tag Archives: 利世民

利世民:教你四招贏在起跑線

2014年1月9日 蘋果日報

一,競爭是硬道理,不過,競爭也要選擇對手。你的子女,他朝的對手,肯定不只幼稚園低班牛頭角區小司儀比賽儀表出眾獎第二名的那位。十八年後,在加州創辦人工智能汽車的那個青年人,今天只有兩歲,跟你家中的瀲鋐、蕓楥……(下刪一千個常人不懂發音罕見字組成之無厘頭中文名)一樣。只不過那位未來的發明家,今天,明天,以及未來的一千幾百天,都不用死記無聊生字。人家的父母只留有空間,讓小朋友去做實驗,培養興趣。

二,怪獸家長老是說要贏在起跑線,其實他們根本不知「贏」字是怎樣寫。說穿了,他們只是怕輸。羊群在死做爛做的同樣一件事,你又迷迷糊糊跑去一起趁熱鬧,那不是贏。要贏,就要做點與別不同的事,做與別不同的事,就有可能輸。有可能輸,就是香港父母最怕的事。

三,港產怪獸家長,絕對不是世界級。韓國、印度等國家的怪獸家長,不會關起門教細路。他們不但願意和別的父母分享升學情報,還會安排比自己子女更醒目的小朋友,一起學習,重點是讓小朋友從小開始,便培養切磋交流的習慣,取長補短。競爭,不只是個人的修煉,還有修養。

高分低能,是有迹可尋的社會現象;不懂得與別人相處,是港孩通病。

四,我個人的經驗是,六歲之前學甚麼語言,幾個月就忘記得一乾二淨。我的女兒六歲離開香港到美國,之前只會幾句英語,到美國三個月後,她已經不會說廣東話,中文字也只認得十個八個。反而當年她只隨便玩幾個月的鋼琴,一年半沒有再接觸,七歲半時,只消一星期就重新上手。我的結論是,六歲前,讓小朋友熟習自己的大小肌肉,鍛煉平衡力,培養點音樂和視覺品味,長遠更有效益。真正超級怪獸家長,不做無謂的操練。贏在起跑線,沒有問題,但眼光總要放遠點。小朋友未來不只是在起跑線;你在起跑線幫倒忙,他們卻要跑一輩子的路。

利世民
http://www.facebook.com/AppleSimon

 
發表留言

Posted by 於 2014/01/09 in 有關教育

 

標籤: ,

利世民:從邵逸夫身上學到的四個教訓

2014年1月8日 蘋果日報

今日肯定有不少關於邵逸夫爵士的生平,但要有幾件事,大家還是可能看漏了眼:

一,邵逸夫2010年才卸任行政主席職務,當時已經是一百有三,是有史以來年紀最大,也是任期最長的上市公司主席。事實上,1967年11月19日無綫電視啟播,也是邵逸夫的生日,那一天他已經60歲。人家可以60歲才創業,之後繼續工作近50年,那些廿歲出頭嚷着要四十歲退休的人,有沒有想過自己的人生有甚麼意義?

二,根據維基百科,邵逸夫1924年開始參與電影製作,18歲就做攝影師。那些年,電影是高新科技,十來歲的邵逸夫不去讀書去拍電影,就像今天那些搞科網創業的年輕人一樣。廿世紀初,電影是政治多於生意,尤其是在兩次世界大戰前後,電影被各國政府用來做宣傳工具。不過,邵逸夫簡單得多,他的電影就是娛樂觀眾賺錢。

當年的社會棟樑可能認為這個人眼中只有錢,幾十年後,銅錢上多了點歲月痕跡,邵氏電影也變了文物。

三,1967年無綫電視啟播,比當年的暴動,對日後的影響更大。七十年代粵語文化興起之後,香港人才有香港人這個身分意識。香港人和澳門人對主權移交以及身分問題有如此差異,最主要的因素,正是身分認同。但正如之前所講,邵逸夫做生意只是做生意,也沒有想到最終竟然在幾十年之後,香港政治最大的一個結,竟然源於他創立無綫電視。話說回頭,除了成功奠定粵語文化,香港人身分,無綫也建立了觀眾「睇電視」的習慣;說邵逸夫是Marketing殿堂級人物,絕不為過。

四,從前,拍一套電影,據說最快要七天,是世界級的速度。無綫電視拍劇集的效率,遠高於此。這種劇集製作的Re-engineering,既是世界第一,也曾經是舉世無雙。曾幾何時,香港無論在電影和電視,都是文化產業的創意中心,後來淪落到要政府去促進發展;只差了一點創業精神,氣氛已經差天共地。

利世民
http://www.facebook.com/AppleSimon

 
發表留言

Posted by 於 2014/01/08 in 有關人物

 

標籤: , ,

利世民:點樣發達?

「點樣發達?」呢四個字,財經版讀者每日都會諗。「有錢咪發達囉!」好多憤世嫉俗嘅人咁講;我更肯定,抱有呢個想法嘅,好難發達。

「有錢都唔算發達?咁點先算發達?」真正嘅有錢人,絕對無一夜致富呢回事。「錯喇!睇吓搞Instagram班後生仔,一夜之間,畀facebook用十億收購,個個富過中六合彩!」

一夜之間?不如問吓自己,人地捱更抵夜做隻App嘅時候,你又做緊乜?成功之前,有好多汗水,但成功之後,都被人遺忘,膚淺嘅人,總以為成功係一夜之間嘅事。

Instagram由開始到被人買起,用咗一年半時間;一年半,話長唔長。今日見到十億呢個銀碼,自然覺得一年半係極速爆起。不過,假如無呢個結局,又會有幾多人關心呢間公司呢?

「手機最重要功能,除咗上網,就係影相,第三先至係講電話。成功將影相同上網分享搓埋一齊,抵佢發達啦!」事後孔明,永遠都係最易做。不過,一年半前隻好似Instagram嘅App,會有幾多人同你講:「乜facebook唔係有相簿功能咩?好多人都做咗影相App啦,你隻嘢有乜咁特別?」

當你同人講,成功,並唔一定要全球獨家,只要做得比人家好、更精細、更有信念,嗰班以為有錢就等於發達嘅人就話:「嘥氣啦!信念邊搵到錢㗎?實際啲好喎!」

實際啲?點解硬係有人會覺得,有信念就係等於唔實際呢?呢種態度,香港人特別嚴重。會唔會係大家從小都已被填鴨式教育洗腦,覺得乜嘢都有標準答案,人生目標,就係去估中個標準答案。獨立思考,反而會斷送前程?

返去最原本嘅問題:「點樣發達?」

可以做一件事,有人要,你自然會搵到條路,堅持落去,就有機會發達。係咪好簡單?。不過偏偏好多人,寧願信發達係一夜間嘅神話。對唔住,我忘記咗,機會永遠都只係留畀願意去爭取嘅人。

利世民 
專欄電郵:SharpHK.Simon@gmail.com 
Facebook專頁:www.facebook.com/AppleSimon

 
發表留言

Posted by 於 2012/04/12 in 有關商業

 

標籤: ,

利世民:窮小子長大後五個最傻氣嘅習慣

2012年2月13日 爽報

上星期,爽人物訪問九巴車長阿龍。呢位記者筆下嘅好爸爸,希望政府可以派錢,因為舊年佢一家四口收左筆錢之後:「即刻跑去買咗個新電視機……其餘嘅錢,用嚟辦年貨同交保險,好似出雙糧。」

改變窮嘅心境,不但止係脫貧嘅第一步,更加可以即刻提高生活質素。網上有一篇理財文章「窮小子長大後五個最傻氣嘅習慣」(The 5 Stupidest Habits You Develop Growing Up Poor),我覺得好值得香港人參考:

一,愛上垃圾食物。當一個人窮,買野嘅時候,都只係會睇價錢。世界上,有營養又好食嘅野,可以好平,不過,一定要花心機去搵去諗去整。當一個人對眼淨係睇到個價錢牌,要佢去搵去諗去整好食又有營養嘅食物,機會微乎其微。結果,對呢啲人來講,垃圾食物就成為佢地心目中最美味嘅食物。美國有美式垃圾食物,香港地一樣有港式垃圾食物。

二,一收到錢就即使晒。對好多銀行無結餘嘅人,一收到錢,第一件事,就係諗點樣用咗佢。我明白,佢地有好多野想要,就好似爽人物訪問個位九巴車長阿龍一樣。我亦聽過唔少故事,話啲中左六合彩嘅人,過左幾年就打回原形。其實道理好簡單:好多消費品,其實都係可有可無,好多人可以唔需要呢啲消費品,一直生活落去,但係手上一旦多咗筆錢,就心郁郁。學習有錢唔使,係理財嘅第一步。

三,將過節送禮睇得好大。延續上面一條,好多窮人,自細習慣每年只有過時過節先至可以盡情消費。呢個習慣,好多人大個咗之後,都唔會點變。

四,時時實銀行戶口。當個戶口得番$138.76,任何人都好自然會時不時都去睇下,究竟幾時會出糧,同埋諗下之後幾日每日可以使幾多錢。我都試過有咁嘅日子。尤其是有網上理財,我會得閒就登入,望下有幾多錢;呢個壞習慣,不但只令一個人持續地緊張,最大嘅問題係:一旦需要為未來承受些少財務風險,習慣睇住個銀行結餘做決定嘅人,會傾向唔博,好多時就因此失去機會。

五,錯過慳錢機會。餐搵餐食餐餐清嘅人,只會響最後一刻去做消費決定。如果今日洗衣粉大減價,但係屋企又未用晒,你會唔會賣定先?洗衣粉係小事。其他大銀碼消費品呢?爽人物九巴車長阿龍買個部電視嘅時候,唔知電器舖有無做減價呢?

專欄電郵:SharpHK.Simon@gmail.com 
Facebook專頁:www.facebook.com/AppleSimon 

 
發表留言

Posted by 於 2012/02/13 in 有關商業, 有關情理

 

標籤: ,

利世民:淨係識派錢 正一敗家

2012年1月30日 爽報

每年臨近財政預算,我都會寫番幾篇關於政棍醜態嘅文。上星期,我就喺蘋果《利字當頭》整咗篇「政壇茄喱啡亂舞香港」,鬧班唔長進嘅敗家政棍,淨係識派錢但又唔會爭取退稅。結果呢個立場,當然有讚有彈啦!本少爺就寫政治,令到部份人唔高興,絕係正常。我又唔係政客,唔需要取悅公眾。我就係要堅持:救濟就係救濟,派錢並非政府應做嘅事;如果認為庫房水浸唔妥,就應該減稅退稅。

「減稅退稅益唔到冇交稅嘅人!」次次我講呢個題目,一定有人咁講。

港元美元低企掀通脹

我大膽問句:「無交過稅又想佔盡便宜,呢種想法算唔算蝗蟲?」

「點同啊!我哋係香港永久居民!」

嘿!好一句「香港永久居民」,你上一代做咗個非常正確嘅決定。你呢?你做過啲乜?有納稅人又因乜事好似欠咗你班人?

「香港因高地價政策,所以政府收入中最主要並唔係稅收,而係土地收入。所以租金貴令物價都貴,老百姓生活好慘。有能力納稅嘅人,係制度下嘅得益者,有責任去幫吓嗰班連稅都無得交嘅人。」一街講法似是而非,難得竟然無人反駁!

1. 乜嘢叫做幫吓人?乜嘢叫做搶?大家識唔識分?如有朝一日,你行行吓街,有個人走埋來同你講:「見你身光頸靚,荷包梗有唔少。呢排通脹,我有少少手緊,唔該攞住一千幾百傍吓身。」呢啲叫做搶,ok?將個角色換咗政客,點解就唔係搶?

2. 有能力交稅嘅人,並非制度下既得利益者。我哋只係更加努力,更加願動腦筋。其他人嘅不幸,我哋同情,但唔好逼我哋去負責。

3. 香港有高地價政策?點解由99年到03年政府又唔貫徹高地價政策呢?有無天才可解釋吓?點解當年政府出盡九牛二虎之力都搞唔番起個樓市?

4. 「物價貴因租金貴,租金貴因樓價高」呢個錯到離晒大譜嘅經濟觀,竟無人踢爆!唔該大家記住:租金貴唔係因為業主瘋狂加租。租金貴,因有人畀得起!有人畀得起貴租,因購買力撐得住。有超強購買力,先有天價租值,然後再有鑽石級呎價。當然低息環境絕對有影響,但根本關係仍無變。講到底,港紙跟美元長期處低位,結果一定係通脹,輸家一定係低收入人士。問題係,我哋願唔願意畀港元自由浮動?

利世民
專欄電郵:SharpHK.Simon@gmail.com

 
發表留言

Posted by 於 2012/01/30 in 有關經濟, 有關情理

 

標籤:

利世民:價格分歧和劏客

2012年1月26日 爽報

農曆新年假期睇新聞,來來去去仍然係中港矛盾。孔慶東詆毀香港人係狗,之後又反口,死都唔認。唔通佢當香港人係白痴?另一邊廂,有大陸網民發起,年初五集體去地鐵食嘢。不過,有理由相信,中國人向來難以團結,呢個創舉,恐怕都係講就天下無敵。

早兩日《蘋果日報》有一單新聞都幾耐人尋味。話說一間名為廣東燒味嘅茶仔,餐牌實行一國兩制:「遊客價貴五成到一倍,本地人就收正價。」嘿!如果廣東燒味個老闆話撐香港人抗通脹: 「自由行遊客正價收費,本地人特惠半價。」唔知會唔會有人封佢做香港良心呢?

同朋友P講傾開劏自由行客。佢話去開上環一間涼茶舖食龜苓膏,舖外大大隻字寫「特級龜苓膏$300」。入到去,只要用純正港式粵語問:「有冇唔係嘅特級龜苓膏?」阿姐自然會好醒目咁話:「你咁靚仔,食平時個隻50蚊就OK啦!」

記得大教授張五常名作《賣桔者言》講過:「同樣的貨品,同樣的成本,以不同價格出售,叫作價格分歧(Price Discrimination )。」

通脹令價格嚴重扭曲

張大教授通過實踐得出結論:只要訊息成本夠高,就可以實行價格分歧。遊客人生路不熟,訊息成本一定高。不過,最令我覺得有趣嘅係,涼茶舖竟然將個價錢貼出來,都可以玩價格分歧,道理又點講呢?

其實,聽到朋友P講呢間涼茶舖,我第一個問題係:「呢間舖嘅老闆唔怕趕客咩?」

朋友A插嘴話:「300蚊龜苓膏,賺死人咩。趕走晒啲本地客都唔驚啦!」不過,做食肆完全無本地客幫趁,一睇就知到係劏客啦。

我另一個問題係:「$300龜苓膏個牌,係唔係殘體字?」

朋友P:「好似唔係喎!成間涼茶舖都係正體字,忽然有個牌寫殘體字,你真係當自由行係白痴咩?」

言語不通,絕對係遊客嘅訊息成本。更重要嘅係,過去幾年,通脹令到價格嚴重扭曲;乜嘢算抵,乜嘢叫貴,越來越難單憑直覺去判斷。尤其是今日大陸嘅物價更加係完全無譜。

喺呢種物價亂晒籠嘅世界下,自然會孕育出靠價格訊息成本生存嘅人。所以,我幾時都話,通脹唔只經濟學咁簡單,更加係社會現象。

利世民
專欄電郵:SharpHK.Simon@gmail.com

 
發表留言

Posted by 於 2012/01/26 in 有關商業

 

標籤: ,

利世民:與民為敵 泛民輸得有道理

2011年11月8日 爽報

泛民和泛民的死硬派支持者,輸了今次區議會選舉,你們一定心有不甘。從政以來都在打順景波的公民黨黨魁梁家傑說:「不希望香港區議會只是蛇齋餅粽,只是派福利派實利的代理人。」

睇怕你們仍然未知輸字點寫,以下十二點,希望可以點醒你們:

一,民主的意義,就是參選的人有機會輸。如果在你們心目中,民主等於「自稱民主派的人便長玩長有」。對不起,你們搞錯了。

二,從政、做生意和談情說愛都一樣,要是被人離棄,請不要怪別人不懂欣賞你的好處。請你問問自己,那裡做得不夠。

三,輸不起,便不要從政,不要做生意,也不要談情說愛。

四,每次你將輸贏的責任推卸到別人身上,你也白白放棄進步的機會。

五,選舉的確是講動員,也講資源。不過,如果說你們將輸贏全部看成動員和資源,那實在是太過低估了選民的智慧。

六,說人家獻世派有「蛇齋餅粽」。嘿!泛民何嘗不是天天在慷他人之慨,企圖打劫少數的納稅人,討好他們心目中的大多數「基層」?

七,基層?泛民啊,泛民,你們當中沒有幾個研究功夫底子札實一點的社會學者朋友嗎?他們沒有告訴你們,其實香港人的主流意識傾向保守?

八,一直以來,保守的香港人,默默投票給你們,就是希望香港可以至少50年不變。可是,過去幾年,究竟是誰在將香港翻天覆地?

九,許多中產納稅人、家長和業主,其實有滿肚子的怨氣,不過我們卻想不到一個理由去投票給你們。我們當中甚至有不少曾是泛民的長期支持者,也對你們感到厭惡。

十,說到底,如果你們到這一刻仍然認為,你們輸是因為選民沒有眼光,因為蛇齋餅粽。對不起,我覺得這是你們應得的教訓。

十一,重申一次,只有最蠢的政客才會將選民放在自己的對立面。你們可能慣了做高高在上的尊貴議員,不過請記緊,面是人家畀,架永遠是你們自己丟!

十二,請你們記住自己經常掛在口邊罵政府官員的一句:不要與民為敵。

 
發表留言

Posted by 於 2011/11/08 in 有關時事

 

標籤: , ,